Izquierda Xunida, Podemos y Equo apoyen la consulta ciudadana sobre'l modelu d'Estáu
Menos d'una hora depués de que tolos medios de comunicación dieran la noticia de l'abdicación del xefe del Estáu, Juan Carlos I, les redes sociales llenábense de peticiones pa la convocatoria d'un referéndum onde la ciudadanía escueya de manera democratica'l futuru xefe d'Estáu. Dalgó qu'al final convirtióse en que delles plataformes convaocaren pa les 20 hores d'hoi llunes, 2 de xunu, una concentración en favor de la república. N'Asturies tán convocaes delles concentraciones en: Uviéu (Plaza de La Escandalera); Xixón (Plaza del Ayuntamientu); Avilés (Plaza del Ayuntamientu) y Llangréu (Plaza del Ayuntamientu). Asturies pola República, al traviés del so perfil na rede social Facebook, organizó un eventu baxo'l nome "Felipe, no serás rey", qu'hasta'l momentu recibía l'apoyu de más de 750 persones. Amás, en Twitter la noticia convirtióse nel eventu del día y la rede social enllenóse de hashtgs como por exemplu, «III República», «Referéndum Ya», o «A por la tercera».
Otra manera, partíos políticos como IX, Podemos o Equo tamién se sumaben a la petición de referéndum. El coordinador xeneral d'IX, Manuel Orviz, consideraba al traviés d'un comunicáu, que la crisis institucional que representa l'abdicación del rei «resuélvese con un referéndum sobre monarquía o república». Orviz, nesi sentíu, añadió que tanto'l PP como el PSOE «lo único que van facer ye blindar a Felipe VI». El coordinador d'IX Asturies manifestó la obligatoriedá de facer un procesu constituyente republicanu con un referéndum «como salida a la restauración borbónica que respaldarán PP y PSOE».
Pela so parte, la formación política Podemos comunicaba na so páxina web que «nun hai escuses pa que los ciudadanos y ciudadanes nun puedan decidir la forma d'Estáu na que quieren vivir». Y aseguren que nun contestu de crisis social, económica y política, un cierre por decretu d'una decisión tan relevante como la forma del Estáu «pue dar pasu a un llargu ciclu d'inestabilidá política y afondar na yá mui grave crisis de llexitimidá del sistema».
Nesa mesma llinia, Equo, na so web, apuesta por «una república ciudadana frente a una monarquía anclada nel pasáu». D'esta manera, el partíu políticu verde manifestaba'l so convencimientu de que ye'l momentu de dar la voz a la ciudadanía «pa qu'ésta decida sobre'l medelu d'Estáu». Dende 'l partíu ecoloxista espliquen que la monarquía «nun ye quién a dar soluciones a la presente crisis económica, social y política».