La banda asturiana de rock Dixebra sigue cola so xira de presentación de Tiempos Modernos, el so últimu trabayu discográficu. Depués de presentalu n'Avilés (ciudá natal de la banda) agora toca-y a Uviéu, concretamente na sala Whippoorwill, el 15 de febreru, a les 23.00 hores. Amás, antes y depués del conciertu, Dani Anti$tilo (otru artista míticu de la escena asturiana), va ofrecer en dos sesiones el set «L'arradiu pikiñina/ Fuck da System Sound». La entrada ye de 10 euros (anticipada) o 12 euros na sala.

Tiempos Modernos ye'l discu númeru 12 de la banda avilesina y con el faen una crítica a la crisis actual pero, sobre manera, a los causantes de la mesma, nun claru guiñu a la película mítica de Charles Chaplin. Nesti LP de quince temes Dixebra mezcla dellos estilos músicales -como ye vezu-: rock, reggae, punk, ska, rap, folk o funk, que demuestren qu'esti grupu nun tien prexuicios musicales y, al mesmu tiempu, dexa claro qu'en Dixebra la continuidá del grupu ye la so propia evolución. La temática de les canciones va dende la represión policial, hasta'l desempléu, la crisis económica, la banca o'l capital financieru... Lletres que tán mui apegaes a la realidá actual y munches delles tán sacaes de los titulares de los periódicos. Amás, por primer vez la banda asturiana dedica-y un tema a Avilés, la ciudá onde nació'l grupu hai yá la friolera de 27 años.

Les collaboraciones son siempre una parte fundamental nos discos de los avilesinos y nesta ocasión Dixebra cuenta con dellos músicos y cantantes como Lisardo Prieto, Toño Gómez, Javier Tejedor, Victoria Álvarez Vito, Ariane Valdivié o Shalom.

«A golpe de tacón», «Banqueru», «El monu con suerte», o «Don Vito», van poder sentise nel conciertu d'Uviéu, xunto con temes más clásicos y populares de la banda asturiana.