Innovación // Cerveza Caleya ye una empresa d’economía social que entamó hai un añu nel conceyu de sobrescobiu
Resistencia llaboral nes cuenques mineres faciendo cerveza artesanal

Tres mozos irreductibles del Nalón decidieron nun colar de la so tierra y entamar un proyectu empresarial que combatiera l’holocausto llaboral de les cuenques. Nacía asina Cerveza Caleya, bébora artesanal fecha por quienes creen que “se pueden buscar soluciones de negociu alternatives, atractives y comprometíes cola cooperación al desarrollu y la cohesión, atendiendo a la dificultá de facelo en tiempu de crisis, en llares deprimíos pol desempléu”.

, Redacción Asturies
07/06/13 · 15:35
Edición impresa

Nel planeta Cuenca Minera, yá lo dicía un canciu del grupu Dixebra que se nomaba 'Kuenka chunga', tán les coses mal, tan chungues porque l’holocaustu llaboral que se vien viviendo en tol mundu d’un tiempu p’acá, ye ellí una pupa que sangra de va muncho más tiempu.

Lo que enantes foi próspero gracies a industries como la minería o el metal, son güei templos del pasáu, cementerios de fierru ruñentu que según dicíen los políticos de turnu diben ser reconvertíos en centros d’innovación y nueves tecnoloxíes. Por ciertu magar derribaron el mes pasáu un edificiu d’esos nel pueblu de L’Entregu, lo que da una idea de les paradoxes que suceden nesti puntu de Lagrange situáu ente les influencies gravitacionales de Xixón y d’Uviéu.

A pesar de toes estes calamidaes una mocedá d’emprendeores de Samartín del rei Aurelio resiste a les fuercies del holocaustu nel entamu y na creación d’autoempleu cola produción artesanal de cerveza. Son la xente de Caleya.

Fondos que lleguen

Gracies a la presentación d’un proyectu empresarial bien xustificáu la idea de los hermanos César Pinchu y Gonzaga G. Antuña y del so collaciu Silvestre Alonso, Silver, algamó l’acesu a una llínia de créditu ensin aval que permitio-yos encarar la inversión inicial n’equipamientu y la constitución de la sociedá mercantil. La puesta en marcha del aparatu permitió-yos aspirar a subvenciones europees rellacionaes con programes d’innovación y desarrollu rural, ya que’l domiciliu social de la empresa ta situáu nel pueblu de Rusecu, nel conceyu Sobrescobiu.
 

Gracies al programa Leader la inversión inicial quedó reducía al 50%, esquivando les dificultaes primerices.Finalmente, gracies a la concesión d’ayuda económica por parte del programa Leader -del marcu europeu de desarrollu territorial de comarques rurales- la inversión inicial quedó reducía al 50%, un marcu ideal pa entamar nel procesu de produción esquivando delles dificultaes económiques típiques de los primeros tiempos d’actividá comercial d’una empresa pequeña.

“Agora tócanos dir a repartir”, dicen César y Silver, el día que los visité na nave Caleya, mientres ún cargaba a llumbu caxes nel coche y l’otru llimpiaba los enormes tanques de coción. Yeren yá les siete la tarde y la xornada nun diba entá ver fin. “Nun ye sólo producir, la distribución también supón un retu d’envergaura. Nel área de la Cuenca encargámonos nós, pero pa Uviéu y Xixón llévanoslo otru chaval. Si non, ye imposible atendelo too”.

Y ye que, amás de los siempre presentes desafíos, la desgracia cebóse col equipu qu’entamó Caleya. A principios de 2012 fallecía Gonzaga G. Antuña, el tercer sociu. Como César y Silver espliquen con un sen optimista: “préstanos pensar que siguimos tando equí los tres, ya’l recuerdu al nuestru compañeru vamos caltenelu siempre vivu”.

Producción artesanal

Caleya ye una empresa qu’inda nun cumplió un añu de vida -entamaron a producir en xunetu-, pero qu’a poco y a poco ta calando nel mercáu con cierta fuercia gracies a aspectos como la so concepción artesanal y de carácter rural o esi sabor característicu tan innovaor ya difícil de describir que non dexa indiferente al que la prueba.
 

A principios de 2012 morrió Gonzaga, ún de los qu’entamó Caleya. “Préstanos pensar que siguimos equí los tres”.Actualmente la capacidá de produción mensual de cerveza Caleya tien un tope de 3.000 llitros, un aspectu que depende directamente del volumen de los tanques de fermentación de los que disponen n’actualidá. Anque entá nun llegaron nestos meses al tope de producción, la perspectiva ye que pal branu espoxigue hasta los 4.000 llitros al mes, lo que supondría una nueva inversión ya’l correspondiente saltu nel procesu de crecimiento y asentamientu de la marca.

Al día de güei yá se puede disfrutar desti productu en dellos chigres de la cuenca’l Nalón, del Caudal, Uviéu, La Pola Sieru y Xixón, siendo ún de los productos meyor valoraos pol públicu asistente al últimu Festival de la Cerveza de Xixón. Como primicia mundial también adelantamos con información de primerísima mano qu’en feches mui prósimes va tar también disponible a la venta la nueva cerveza Caleya Mayuca, una variante de tipu Amber a mediu camín entre rubia y tostada, y que contién un poco más porcentaxe de graduación alcohólica tamién.

Innovar ye resistir

Por toes estes razones, además del fechu de demostrar que se pueden buscar soluciones de negociu alternatives, atractives y comprometíes cola cooperación al desarrollu y la cohesión; atendiendo a la dificultá de facelo en tiempu de crisis, el proyectu Cerveza Caleya anima a pensar que otra nueva realidá llaboral más próspera pue dase nes cuenques mineres ya en tantos otros llares deprimíos pola llacra’l desempleu xuvenil y la falta de perspectives de prosperidá económica y de autorrealización.
 

Na innovación ta’l futuru, pero sólo si se xeneren sinerxes reales que potencien el desarrollu d’idees nueves.Na innovación ta’l futuru, pero sí y solo sí cuando les administraciones públiques, les empreses, los axentes sociales y los poderes competentes permitan la xeneración de sinerxes reales que potencien y faciliten el desarrollu d’idees nueves, pues el panorama futuru d’un país o rexón cuyos administradores públicos descuiden estos aspectos básicos nun pue ser otru qu’un despropósitu en forma de desiertu industrial, tercermundismo y miseria...

Veremos a ver si entá queda alguna esperanza pa esta xeneración nuestra, la de los fíos de la Transición que vivieron lo que un día se dio por llamar clase media y por cuyos derechos adquiríos va tocanos lluchar otra vegada pa caltenelos. Llarga vida a Cerveza Caleya. Llarga vida a la xente en movimientu.

Tags relacionados: Asturias Asturies
+A Agrandar texto
+A Disminuir texto
Licencia

comentarios

0

Etiqueta de la cerveza Caleya.
separador

Tienda El Salto