La Plataforma d'Afectaos pola Hipoteca (PAH) mantién lleva alantre estos díes unos xornaes informatives na Casa la Cultura de Nava na qu'aconceyen más de 160 representantes de les diferentes plataformes estatales. Según explica Miguel Ángel García, miembru d'esti colectivu n'Asturies, nestes xornaes tamién se va tratar la extratexa a seguir por la PAH nel futuru. Pero amás, García esplica a Diagonal Asturies qu'estes xornaes se faen en Nava por un motivu solidariu y reivindicativu. Y ye que un matrimoniu de Piloñeta (Nava) propietariu del Hotel Fuensanta —qu'amás ye la so vivienda de vezu y qu'ofrecieron a la PAH les sos instalaciones p'agospiar a los participantes nestes xornaes— ta n'execución hipotecaria con Cajastur, «entidá que sí quier llegar a alcuedos col Gobiernu asturianu p'aparecer en prensa, pero que nun quier llegar a alcuerdos cola ciudadanía», critica García. Amás, según él esta entidá bancaria «diz non» a la dacción en pagu a los ciudadanos y concretamente a «Marcos y Mónica —responsables del Hotel Fuensanta— que son un exemplu d'emprendedores y que llegaron a esti pueblu de Piloñeta onde fixeron un hotel y ayudaron a los vecinos na reforma de les escueles y carreteres y agora Cajastur nun quier llegar a nengún tipu d'alcuerdu». La entidá financiera «namás quier echalos a la cai y cuanto primero meyor, porque vemos intereses económicos y especulación pa quedar con una casa y un negociu pa beneficiu y disfrute de dalguna persona de Cajastur», sentencia Miguel Ángel García.
A pocos metros de García ta Marcos Álvarez, propietariu del establecimientu afectáu, conversando con otres persones de la plataforma. Álvarez comenta que depués de munchu tiempu intentando llegar a un alcuerdu con Cajastur «vímonos nun procesu de desahuciu non deseáu». Amás, quéxase de llamaes telefóniques de presión dende la central y dende la suscursal de la entidá y de que depués de pidi-yos una montonera de documentación pa estudiar una meyora de les condiciones —«que nosotros entregábemos cola idea de solucionar esta situación», diz Álvarez— esta información valía-y a la entidad financiera pa llevar a esti matrimoniu a una cai ensin salida.
«Nel nuestru casu nos dexen ensin casa, con nun neñu y ensin trabayu, ni desempléu porque somos autónomos. Polo tanto, tamos destinaos a la esclusión social y a vivir un doble procesu traumáticu por la so relevancia especuladora», esplica. Marcos Álvarez y la so muyer quieren pagar la deuda que tienen con Cajastur pero con unes cuotes más reducíes, pero aseguren que como la so deuda ye mui pequeña la entidad financiera nun quier. «Ofrecen esperances cuando valoren la to situación, pa depués dar llagues y dicir que nun se pue facer», manifiesta esti vecín de Piloñeta que lleva más de dos negociando con Cajastur pa regularizar la so situación y encontrar una vía de solución. «Podemos demostralo con e-mails que-yos unviamos; ellos nunca dexen nada per escrito porque toles sos comunicaciones yeren telefóniques», diz Álvarez.
Esti matrimoniu que ta'l frente d'un hotel que cuenta con dellos premios y reconocimientos qu'avalen el so llabor profesional tien ciarráu l'hotel en plena temporada alta d'ocupación hotelera p'agospiar a los miembros de la PAH y pa «demostrar que nun somos como eses entidaes estafadores. Cajastur dexónos en quiebra total y los nuestros clientes, escoyendo la nuestra casa pa les so vacaciones van danos la opción de poder siguir viviendo» esplica esperanzáu el propietariu del Hotel Fuensanta.