Yá ta too preparao pa la celebración de la quinta edición del Festival Rebolleres Rock, nel Prau de Gervasia de Candás (Carreño), que va llevase alantre'l 27 de xunetu a partir de les 20.30 hores. Na edición d'esti añu van participar los grupos asturianos Skontra y Skama la Rede y como cabeza de cartel la banda madrileña Boikot. hai que recordar que tolos conciertos son de baldre.
Depués de dellos años d'ausencia, l'Asociación Xuvenil Trisquel -responsable de la organización que recuperó esti festival l'añu pasáu- vuelve a llevar alantre esta cita cola música rock y, amás, aseguren que quieren consolidala. Pa ello la edición d'esti añu presenta delles novedaes. A partir de les 19 hores va abrise'l festival cola inauguración del Rebolleres Solidariu, un actu que pretende ayudar a la xente, tanto del propiu conceyu candasín como d'otres partes del mundu, que ta pasando dificultaes. Pa ello, la organización va contar col sofitu de Cruz Roja que va tar recoyendo nel Prau de Gervasia comida y dinero que los asistentes al conciertu puedan donar pa esta causa solidaria.
Otra manera, nel festival va ponese una jaima saharaui onde la xente va poder probar de baldre cuscús y té del país africanu. Tamién van recoyése apoyos pa la causa saharaui al traviés de la campaña "Yo reconozo a la República Árabe Saharaui (RASD)", onde los asistentes van poder retratase con un cartel de sofitu a la RASD.