Pensar nel futuru d'un movimientu políticu plantega siempre munchos interrogantes. Hai que facelo mirando pa la hestoria de la que se vien y partiendo d'un presente nel que les interrogantes son bien fondes. L'asturianismu políticu vien arrastrando una tradición desigual no tocante a los resultaos electorales y el caláu social del movimientu. Sacante dalgunes excepciones, la confianza electoral depositada pola ciudadanía foi más bien probe. Sicasí, tien algamao un pesu específicu dientro de la sociedá, lo qu'amuesa l'esmolecimientu d'una parte de la mesma que concibe Asturies como suxetu políticu concretu, autónomu y que se preocupa pol so futuru. En Compromisu por Asturies pensamos qu'a esa manera de ver Asturies ye imprescindible da-y una ferramienta política, polo que consideramos válida y necesaria la nuestra propuesta.

El por qué d'esti desequilibriu políticu y social tendió a achacase a la atomización de les opciones polítiques, pero nos últimos años dierónse bien de pasos pa esclariar esti panorama, pa facer confluyir proyectos y persones, propuestes y estratexes. En Compromisu avanzamos per esi camín.

Momentu de cambiu

Nel presente, nun somos ayenos a la situación pela que ta trevesando Asturies y el conxuntu l'Estáu. Nel ámbitu territorial tamos nun momentu de cambiu, y nun contestu económicu y social tan difícil como esti, tenemos toles de perder si nun articulamos un discursu de defensa del territoriu, de la xente y del mediu. Eso ye pensar en clave asturiana.

“Tenemos toles de perder si nun articulamos un discursu de defensa del territoriu"Esta perspetiva queda coxa ensin la variable d'izquierdes que tien d'acompañanos. Nun podemos permitir que la clase política tea al serviciu de los intereses económicos nin que les sos decisiones nun s' empobinen a la meyora de la calidá de vida de les persones, nin que'l poder tenga cada vuelta una forma más centralizada, alloñándose de los problemes de la xente.

El futuru plantéganos interrogantes sí, pero tamién oportunidaes. Va venceyáu al cambiu, y creemos qu'esi cambiu ta nes nuestres manes. Ye tiempu de recomponer l'asturianismu trabayando les bases, discutiendo los pegollos del so discursu.

La parte política ye una consecuencia, nun ye una causa y nun s'entiende ensin una forma de ver el mundu nel qu'Asturies y les sos singularidaes tengan espaciu propiu. Tenemos de afrontar les maneres nueves énte les que la sociedá ta respondiendo a les agresiones, abrinos a persones y maneres d'entender l'acción política revindicativa. Sofitar, pero tamién aportar la nuestra visión dende l'asturianismu políticu d'izquierdes.

Con ello non solo señala que’l movimientu nun ta en decadencia sinon que representa un nuevu mou d’actuar.