Diagonal Asturies va a más. Esto que tás lleendo ye l’aniciu de la nueva era dixital del periódicu d’actualidá crítico asturianu; paralelamente la edición impresa, trimestral y gratuita mantién la tirada de miles d’exemplares y espoxiga de les 12 a les 16 páxines. Nueves compañeres y compañeres vienen a reforzar un proyectu que mos abulta yá de manera definitiva afitáu y consolidáu.
Nel nuestru particular Gran Salto Adelante (Dà yuè jìn en pinyin, pa los que nun sepáis chino nin tradicional nin simplificao) la xera contrainformativa n’Asturies garra un calter más estable y ellaboráu. Faltábanos a quienes facemos Diagonal Asturies caltener el pulsu de l’actulidá cola inmediatez y la flesibilidá que da lo dixital, y por eso naz güei la nueva web que tenemos el placer d’ufrivos. Una páxina que surdió del apoyu económicu de miles de pequeños microaccionistes que pusieron perres pa financiala porque creíen na necesidá de que Diagonal fuera viable. Tardó, pero equí la tenemos, con un diseñu actual y atractivu y una navegabilidá cenciella, al alcance de cualquier usuariu. Dende ella podréis lleer el númberu actual y los precedentes, filtrar les noticies por secciones o conectar cola edición estatal de Diagonal.

La nueva web surdió del apoyu económicu de miles de pequeños microaccionistes

Vien a dicir Fran Gayo na so columna del mediu hermanu Glayíu que yá mos val de afrontar los fechos ensin enfrentanos a ellos, de dexar que seyan les mayoríes silencioses les que faigan irremediable lo que sí tien arreglo, de ser minoría vocinglera pa convertinos en mayoría que construye alternatives. Tamos d’alcuerdo. Pa ello ye imprescindible contar con medios propios y rigurosos, qu’informen de los temes que-yos pueden interesar a la mayoría de los mortales, más lloñe de les cuestiones autorreferenciales de la izquierda más a la izquierda que namás suelen prestar a la capilla propia. Y davezu ni a ésta. Creemos que la gran virtú del nuestru mediu ye precisamente ésa, aportar unos conteníos más esbillaos y profesionales nel fondu y nes formes, con un estilu cuidáu y propiu pero cuntando lo que nun sal nos medios comerciales o dando una versión diferente de les verdaes oficialistes. En vosotres y vosotros ta el valorar si les nuestres pretensiones se cumplen o si namás mos quedamos nel intentu.

Yá mos val de dexar que seyan les mayoríes silencioses les que faigan irremediable lo que sí tien arreglo

Diagonal Asturies sigue, pasín a pasín, buscando convertise nun medio de comunicación críticu pero xeneralista, n’interacción cola parte de la sociedá civil asturiano que nun se resigna a asistir como convidáu de piedra a la lliquidación del nuestru presente y colos movimientos sociales que traten d’encadarmar la necesaria alternativa. Si vos presta lo que contamos nes actuales 16 páxines y lo que lleéis nesta web, vos invitamos a que collaboréis col proyectu de la manera que vos abulte más afayaíza: suscribiéndovos a la edición estatal de Diagonal, distribuyendo exemplares de la edición asturiana nel vuestru ámbitu o anunciándovos nos espacios pa publicidá colos que cuenten el periódicu y la web, principal fuente d’ingresos d’esti proyectu.

Sólo mos queda esperar que el nuestru Gran Saltu termine considerablemente meyor que el del Gran Timonel. Pela nuestra parte pondremos tol saber y capacidá nel empeñu.