El Comite de Solidaridá cola Causa Árabe d'Asturies (CSCA) y dellos colectivos y organizaciones presentes na Cumbre Social y de la Plataforma contra la Guerra, acaben de convocar una concentración pal miércoles 30 de xunetu en Xixón, a partir de les 20 hores nel Náuticu, en solidaridá col pueblu palestín, que ta siendo masacrau impunemente pol exercitu d'Israel dende hai delles selmanes.
Baxo'l lema No es una guerra, es una limpieza étnica, un genocidio, el CSCA d'Asturies quier denunciar la situación que ta sufriendo'l pueblu palestín na Franxa de Gaza y, al empar, esixir a los gobiernos que «dexen de ser cómplices» de la mesma y condenen enérxicamente a Israel «polos crímenes cometíos contra la población civil de Gaza pa que s'apare inmediatamente la ofensiva militar».
Desque Israel entamara hai más de tres selmanes la so campaña militar contra Palestina, 1.101 palestinos y palestines foron asesinaes y yá hai más de 6.500 persones mancaes. Nes últimes 12 hores l'aviación israelí bombardeó la escuela Bahrain de la UNRWA en Tel Al-Hawa (Gaza) y el campu de refuxaos d'Al Bureij de la mesma ciudá. Los bombardeos tamién se producieron sobre'l puertu de Gaza y les cases de los pescadores, según informaron miembros del Movimientu de Solidaridá Internacional (ISM). Amás, el bombardéu de los tanques israelíes alcanzó la única centra eléctrica de la ciudá, dexándola totalmente fuera de funcionamientu.