Les primeres movilizaciones nel casu los ERE's propuestos por Coca Cola Iberian Partners son dende güei una realidá nes cuatro plantes afectaes en Palma de Mallorca, Fuenlabrada, Alicante y Cualloto (Asturies). Nel casu asturianu la plantía cortó al mediu día la antigua carretera de Santander a la altura la fábrica, cumpliendo col paru de dos hores por cada turnu propuestu polos sindicatos mayoritarios, CCOO y UGT. Estos paros tan convocaos tamién pa los próximos díes 6, 11 y 13; mientres que los díes 18 y 20 los paros van ser de 24h.

Con estes midíes los y les trabayaores de les fábriques dependientes de Coca Cola Iberian Partners manifiesten el descontentu por un proceso de ERE que va afectar a 1250 persones de les cuales 750 van ser despidíes y otres 500 recolocaes en dellos llugares de trabayu diferentes, lo cual tamién implica una movilidá pa los más afortunaos.

Na planta de Palma de Mallorca el seguimientu de la xornada de paru foi calificáu como altu, en tornu al 80%, mientres que na planta de Fuenlabrada una treintena de trabayaores entamaron dende ayeri una acampá pa protexer la fábrica, ya non del cierre sinón del posible desmantelamientu d'esta a partir del próximu día 28 de febreru. Fecha na que ta programáu el cierre de la misma.

Estes acciones a nivel nacional vienen precedíes de les acontecíes nel día "Zero" na planta d'Alicante, donde'l paru foi masivu ya incluso hubo acciones informatives pa frenar y boicotear el consumu del popular refrescu.

No referente al casu asturianu hai de destacar qu'el Conseyeru d'Industria, Graciano Torres ya se reunió güei por primera vez cola representación de la multinacional (Coca Cola Iberian Partners) y volverá facelo nos prósimos díes a fin de alcordar una solución digna pa la planta asturiana d'Asturbega y la so plantía.