La propuesta antiabortista pue salir alantre colos votos del PP y UPyD
La Plataforma Feminista refuga una Proposición de Llei por «recortar» el derechu a decidir de la muyer

El viernes 15 de payares la Xunta Xeneral va llevar al plenu una Proposición de Llei d'iniciativa llexislativa popular pola que s'establez y regula una rede d'apoyu a la muyer embarazada. Por cuenta d'esto la Plataforma Feminsita d'Asturies ta acabante de facer públicu nun comunicáu'l so refugu a esta propuesta al considerala «un atropellu» contra los derechos de la muyer y que, al empar, «recorta'l so derechu a decidir y oblígala, polo tanto, a seguir de manera impuesta con un embrazu non buscáu».

14/11/13 · 18:35
Ignacio Prendes (UPyD) entrando na Xunta Xeneral / Pablo Lorenzana

El viernes 15 de payares la Xunta Xeneral va llevar al plenu una Proposición de Llei d'iniciativa llexislativa popular pola que s'establez y regula una rede d'apoyu a la muyer embarazada. Por cuenta d'esto la Plataforma Feminsita d'Asturies ta acabante de facer públicu nun comunicáu'l so refugu a esta propuesta al considerala «un atropellu» contra los derechos de la muyer y que, al empar, «recorta'l so derechu a decidir y oblígala, polo tanto, a seguir de manera impuesta con un embrazu non buscáu».

La tramitación d'aprobación d'esta llei va salir alantre, según pudo saber Diagonal Asturies, col preste del PP y UPyD y el posible votu favorable de Foro Asturias. La propuesta van refugala PSOE y IX.

La llei que regula la rede d'apoyu a la muyer embarazada n'Asturies parte d'una recoyida de firmes fecha nel añu 2011 por colectivos contrarios al albuertu y que'hasta la fecha taba parada; pero a petición del grupu parllamentariu UPyD vuelve a echase a andar y pue aprobase nel plenu que se va celebrar el 15 de payares a les 10.00 hores.

La Proposición de Llei foi almitida a trámite pola Mesa de la Cámara de la Xunta Xeneral na sesión del 15 de febreru del 2011. Nel artículu 4 diz que se va prestar especial atención a la embarazada adolescente, asina la muyer va contar con asistencia especifica que va incluir, ente otres coses, Educación pa la Maternidá, apoyu psicolóxicu enantes y depués del partu y asistencia singular nel centru escolar p'afayar el so plan d'estudios al embarazu y la maternidá.

Nel artículu 5 pue lleese que'l Gobiernu de la comunidá autónoma va poder conceder subvenciones y establecer convenios colos centros d'iniciativa social que se presten a ufiertar l'asesoramientu y ayuda a la muyer embarazada previstos na llei. Amás, les entidaes privaes que presten ayuda a la muyer pa llevar alantre la maternidá van contar cola cooperación y l'apoyu técnicu de l'Alministración.

Nel artículu 7 la llei contempla qu'en tolos centros asistenciales y sanitarios asturianos va ser obligatoriu informar a la muyer embarazada de la existencia de la rede d'apoyu regulada nesta llei y tamién van dar información sobre l'albuertu onde se va incluir , amás de la información referente a la llexislación vixente na materia, información oxetiva sobre los efectos físicos y psíquicos, incluyendo al síndrome posalbuertu.

En cuantes al artículu 8, el Gobiernu asturianu va ellaborar un plan integral d'apoyu a la embarazada qu'incluya acciones y oxetivos pa facer realidá la existencia d'una eficaz rede d'apoyu y que contega les previsiones siguientes y informaciones (ente otres): la identificación de los centros, prestaciones y ayudes a les que pue acceder la embarazada pa conseguir l'apoyu necesariu pa poder apostar en llibertá pola vida del so fíu; la previsión de campañes públiques pa informar a la potencial interesada de los medios a la so disposición; la instrumentación de campañes dirixíes a los homes, especialmente a los adolescentes, pa motivalos a asumir la so responsabilidá como causantes del embarazu, tresmitiendo lo inxusto de dexar a la so pareya sola ente l'embarazu (...); les midíes que se van poner en marcha pa facilitar l'accesu de la embarazada o madre nueva al empléu, a los recursos destinaos a salarios sociales o conceptos similares (...), y a los servicios de guardería a lo llargo de los primeros años de vida del neñu.

La llei entraría en vigor el día 1 de xineru del exerciciu siguiente a la so aprobación, quier diciese, que si s'aprobara esti 15 de payares la llei diba ser efectiva'n xineru del 2014. Ente esta situación, la Plataforma Feminista d'Asturies, quier denunciar la «hipocresía constante» de la derecha porque, según s'asegura nel comunicáu, «mentres condena ensin problema a les muyeres que deciden sobre la so vida y el so cuerpu, recorten de manera escandalosa toes aquelles propuestes que denden el feminismu venimos proyectando pa prevenir los embarazos non deseaos, sin empléu dignu, ensin educación sexual y igualitaria de calidá, ensin cultura social equitativa y ensin llibertá d'espresión nun se pue facer frente a un problema que la derecha namás se preocupa de condenar». Por esi motivu, el colectivu va convocar una concentración de protesta y una rueda de prensa'l 15 de payares, a les 08.15 hores, delantre de la Xunta Xeneral.

 

+A Agrandar texto
+A Disminuir texto
Licencia

comentarios

0

Tienda El Salto