El 9 d'agostu conmemorase un añu más el Día de los Pueblos Indíxenes, tal y como aprobó l'Asamblea Xeneral de les Naciones Uníes nel añu 2004. Por esti motivu, la Coordinadora Asturiana d'ONGD (CODOPA), xunto con otros colectivos y organizaciones asturianes, quier aprovechar esta fecha «pa continuar reivindicando'l cumplimentu de los sos derechos», según esplica nun comunicáu la CODOPA.
Xixón va acoyer los actos d'esta celebración qu'entama'l 8 d'agostu con la proyección del documental Derecho a existir, Pueblos indígenas, nel Centru Municipal Integráu d'El Coto, a partir de les 19.30 hores. El día 9, a les 11.3 hores, nel Pabellón d'Asturies de la Feria Internacional de Muestres, va celebrase la rueda de prensa de presentación de los actos que conmemoren esta fecha. Y a les 12 va facese una degustación de productos fechos con Quinoa y la llectura del Manifiestu del Día de los Pueblos Indíxenes. Esti actu ta organizáu pola Axencia Asturiana de Cooperación al Desarrollu y cuenta col sofitu de la CODOPA.
Esi mesmu día, a partir de les 17 hores, nos Xardinos de la Reina, va llevase alantre l'espectáculu de cuentacuentos Arenumi​, a cargu de Jhon Ardila. A les 21 hores, Soldepaz Pachakuti-Picu Rabicu entama un alcuentru de música y baille nel Paséu de Begoña.
Otra manera, los actos complétense con tres esposiciones en dellos espacios de Xixón. Tierra Liberada, ye una muestra qu'entama Cáritas qu'avera a la ciudadanía a la realidá de Chiapas (México) y les sos comunidaes, al traviés del Centru de Derechos Humanos Fray Bartolomé de Las Casas. La esposición va poder visitase nel Centru Municipal Integráu d'El Coto, del 8 al 23 d'agostu. Derechos de la Madre Tierra, ye una muestra de dibuxos de Javier Kalvellido qu'entama Soldepaz, sobre la Declaración de Derechos de la Madre Tierra. Esta muestra va poder visitase na segunda planta nel Centru de Cultura Antiguu Institutu, de'l 21 d'agostu hasta'l 9 de setiembre. Amás, el 9 d'agostu tamién s'inaugura, nel Pabellón de la Feria de Muestres d'Asturies, la muestra Bolivia: alternativa indígena y popular, organizada por la ONGD Paz y Solidaridad.
Pa más información y descargar el programa completu pues pinchar equí.