O estado europeo que vende máis armas a Libia é Italia, por un valor de 205 millóns de euros no bienio 2008-2009, a meirande parte pola venda de aeronaves de combate, moitas delas helicópteros.

A empresa de armamento Finmeccanica, na cal participa o Ministerio de Economía italiano cun 32,5%, ten como accionista a Lybian Investment Authority (LIA), a autoridade gobernamental libia, que posúe o 2,01% das participacións desta empresa, cota que pretendía aumentar até 3% para poder ter un asento no Consello de Administración da empresa.

Destaca tamén Malta, que vendeu ao Gadafi por volta de 80 millóns de euros en armas pequenas e municións, probabelmente de empresas de armamento italianas situadas no seu territorio. É salientábel tamén nestes dous anos a venda de armamento a Libia por parte da Francia (143 millóns de euros), a Alemaña (57 millóns), o Reino Unido (53 millóns) e Portugal (21 millóns).

O Estado español, o sexto maior exportador de armas do mundo, non conta con Libia ente os seus principais clientes: as súas vendas representaron por volta de catro millóns de euros.